ياسمين - طارق المحياس

ليش قلبك يا بعد عمري حزين
والله مب لايق عليك هذا الزعل
يا حلاتك يوم كنتي تضحكين
افتحي قلبك وقولي وش حصل
من تجرأ من قطف هالياسمين
من حرمه الزين قبل ما يكتمل
من كسر قلبه وشعوره بكلمتين
ويدري قلبه للعتب ما يحتمل
منهو أرخص قيمة الغالي الثمين
ويدري إنه في عيوني له محل
ومن يقول الورد ما يقطر حنين
ومن يقول إنه وسط قلبي ذبل
يالله قومي يالله لا تتكيسلين
خلي حلمي وياك يوصل لي زحل
يالله قومي يالله لا تتشاورين
خلي حبنا يكون للعالم مثل
قالت أصبر قلت أنتي تامرين
وطالعتني بعين يملاها الوجل
ولا إراديا ذرفت دمعتين
وقالت إنه الزين أبد ما يكتمل
قلت قولي لي ترى سرك دفين
ما بخبر حد لو مهما حصل
بس دخيلك ما أبي هالدمع يبين
مب عشان شي بس والله محتمل
طالعتني وقلت لها شتطالعين
ما في داعي للعواطف والخجل
هذا مب وقته في وجهي تسرحين
جاوبي إحساس قلبي اللي سأل
قالت الشدة بعد فتره تلين
والفرح يقبل إذا باقي أمل
والشقى لازم في يوم إنه يهين
والصعب ياتيه وقت يكون سهل
قلت لها قولي لي ولا تلمحين
ما أحب أسمع كلام ٍ به جدل
قولي شالموضوع إذا إنك تسمحين
وخلي الخوف اللي فيني يرتحل
قالت أهلي ساوموني بدرهمين
وقرروا إنهم يزوجوني بعجل
جا خطبني شخص قدي مرتين
وجابوا المأذون والعقد أكتمل
وافقوا لأنهم بماله طامعين
وبالتجارة والمراكز و الفلل
ليش لأ دام إنهم اللي رابحين
يمكن إنهم يطلعون بكم محل
قالت إلحقني ومد لي هاليدين
ضاع فكري وطار من رأسي العقل
من لي غيرك أشتكي له يالضنين
عطني رأيك عطني لو ذرة أمل
صرت أنا وياك ضمن التايهين
والحزن في دربنا توه إستهل
ليش يا دنيا في وجهي تعبسين
حظي المايل متى بس يعتدل
قالت أتكلم ولو بس جملتين
لا تتم ساكت ترى وردي ذبل
قول لي أي شي قول لو كلمتين
وأنته بس اللي لأمره أمتثل
صدمتي كانت معاها صدمتين
صدمتي كانت في هالمره دبل
كنت بسألها شرايك تملكين
دام خذنا الدبله والحب أكتمل
ما نطقت بشي وأنا ميت حزين
والدمع من فوق وجناتي همل
قمت أشاهق ما أبي نوحي يبين
كني خيل بأعلى صرخاته صهل
قمنا نطالع بعض عين ٍ بعين
ما تكلمنا إلين الليل حل
قالت أنطق لا تقول إنزين
وأنا ساكت والفرح عني رحل
كنت أظن إحنا لبعضنا مكملين
ما دريت الحظ عاند بالفعل
كنت أنا وحدي في عالمها سجين
وكنت أقول الحظ أخيرا أعتدل
قلت لها أذكر كلامك لين الحين
يوم تقولي لي تراك أحسن ريل
صحت فجأه وقلت لها تتذكرين
يوم كنا نخطط لشهر العسل
قلت عشاني قومي ولا تزعلين
وأرضى بالواقع مدام إنه حصل
أسمك بيبقى وسط قلبي دفين
والقمر لازم في يوم بيكتمل
والله بفرح دام إنتي بتفرحين
يالله خلينا بعرسك نحتفل
وإصفعتني كف ع الخد والجبين
وقالت أنته قاعد تكلم طفل
قلت لها وصوتي بنبراته حزين
أوعدني هالزعل آخر زعل
لأنه قلبك ينعرف يوم تزعلين
والله مب لايق عليك هذا الزعل
ومهما ناديتك أبد لا تجاوبين
قصة الحب انتهت مات البطل
افترقنا بعد كل هاذي السنين
وللأسف حبنا في هالمره فشل
إنتهى مشوار أحلى عاشقين
كلن بدربه ولكن ما وصل
كل واحد ينسى مع مر السنين
لكن الذكرى أمرها مب سهل
لين آخر يوم في روحي تسكنين
وصورتك تبقى مثل بدر أكتمل
في بعض الأوقات أقعد مستكين
بس أفكر لين يذبحني الملل
بالفعل قطفوا زهور الياسمين
قطفوا الزهرة قبل ما تكتمل